Nasa ikaapat na taon na ko sa college nang puntahan ako ni Jhun para imbitahan sa kanyang kasal. Nang mga panahong iyon ay saglit kong nakalimutan si Migs dahil talagang na-miss ko ang aking kababata. Parang bumalik iyong feelings ko sa kanya noong mga bata pa kami. Dumagdag pa ang kawalan namin ng komunikasyon ni Migs simula noong magtrabaho siya rito sa Maynila. Hindi ko na makontak ang number niya at ayon sa mga kapatid niya ay lagi raw kasama ng amo nito sa mga out-of-town engagements. Namasukan kasing driver si Migs sa isang lady businessman sa Alabang. Dati kapag tinatawagan ko siya sa telepono ay lagi siyang may ginagawa at pakiramdam ko ay ayaw lang siya ipakausap. Wala naman akong magawa kundi ang maghintay sa kanyang tawag.
December na at malapit nang ikasal si Jhun. Sumapit ang bakasyon at magkahalong emosyon ang naramdaman ko habang bumibiyahe pauwi sa amin sa Bicol. Hindi ako masyadong masaya sa isiping ikakasal si Jhun sa babaeng nabuntis niya at hindi niya naman talagang mahal pero gagawin niya para sa batang isisilang. Naroon din ang pag-asang baka makauwi rin si Migs at magkita na rin kami sa wakas. Marami akong gustong itanong kay Migs, mga tanong na gusto kong maliwanagan. Ewan ko, overwhelmed ako nang mga panahong iyon kaya hindi ko mapigilang umiyak habang iniisip silang dalawa. Hanggang sa makatulog ako.
Nagising ako sa sigaw ng mga nagtitinda ng mga pagkain sa loob ng bus. Saglit na tumigil ang bus sa isang stop over station nito. Malapit na pala kami sa Naga City kung saan ako bababa. Ilang minuto lang at nasa Naga na kami. Sa terminal ng jeep papunta sa aming baryo ay nakilala ko ang mga dati kong klasmeyt na sina Alan, Jackson at Roy. Crush ko ang mga ito noong hayskul ako. Parehong driver sina Alan at Jackson samantalang konduktor si Roy. Sa jeep ni Alan ako sumakay dahil nauna itong bumiyahe kung saan si Roy ang konduktor kaya nakalibre ako sa pamasahe. Nangako akong dadalaw ako sa kanila para makapag-inuman kami dahil hindi raw siya siguradong makakarating sa kasal ni Jhun. Sa tabi ni Alan ako umupo kaya nakapag-kuwentuhan kami. Second cousin ko pala ang napangasawa niya at may anak na rin sila.
Pagdating ko sa bahay ay saglit akong nagpahinga at naidlip na rin. Hapon na ako nagising at naligo agad ako sa dagat kasama ang mga bata kong pinsan. Pinilit kong mag-enjoy at pinagod ko ang aking sarili sa paglangoy. Nagpapahinga ako sa dalampasigan nang may dumating na grupo ng mga kalalakihan para maligo rin. Napatingin ako sa lalaking kamukha nina Jhun, kulot rin ang buhok pero medyo patpatin ang katawan. Nagtatawanan sila habang patakbong lumusong sa tubig. Apat silang mga lalaki na nasa 19-20 ang edad. Limang taon akong hindi nakauwi sa amin kaya parang nanibago ako sa mga tao, hindi ko kilala yung tatlo pa niyang kasama. Hindi nila ako napansin dahil nasa tabi ako ng isang malaking bangkang de-motor. Nahulaan ko na si Vince ang nakita ko, ang bunsong lalaki nina Jhun. Nung huli kong kita sa kanya ay uhugin pa siya. Ngayon ay tumangkad bigla pero payat, hindi katulad nina Migs at Jhun na well-developed and katawan. Naalala ko naman si Migs, at napaluha na naman ako.
Nagpupunas ako ng luha nang may magsalita. "Okay ka lang?" Nagulat ako at nang pagtaas ko ng mukha ay nakita ko si Vince sa harap ko.
"Ha? Oo, napuwing lang ako," sagot ko.
"Dumating ka na pala. Hindi kita napansin kanina, sinabi lang sa akin ng mga pinsan mo." Umupo siya sa tabi ko.
" Kanina lang umaga. Kumusta na si Tito?" pangungumusta ko sa tatay nila.
"Ayun, sinusumpong na naman ng rayuma. Punta ka mamaya sa bahay, matutuwa iyon."
"Oo, ba." Saglit na katahimikan. Parang nahihiya ako.
"Punta ka ba sa kasal ni Kuya sa makalawa?" tanong ni Vince.
"Gusto niya nandoon ako."
"Pero gusto mo ba?" Nagulat ako sa tanong niya. Napatingin ako sa kanya, nagtatanong.
"Akala mo hindi ko alam, no. Remember, iisa lang ang kuwarto naming magkakapatid."
Namula ko sa sinabi ni Vince. Ibig bang sabihin ay alam niya ang nangyayari noon kapag natutulog ako sa bahay nila at katabi ko ang Kuya Jhun niya? Pero bata pa siya noon.
"Okay lang 'yun. Kung gusto mo ng kausap andito lang ako."
Biglang tinawag ng mga kaibigan niya si Vince.
"Kuwentuhan tayo mamaya sa bahay. Inuman tayo," sabay tapik niya sa aking balikat at tumayo na para lumusong ulit sa dagat. Hinabol ko siya ng tingin.
